Wat ene Dress

Am Rhing, do litt en ahle Stadt – do jitt et Lück, die schwade Platt,

dä eine kann et, dä andere nit – wat mäht dat ald, do drink mer met.

Un hät mer och de Nas ens voll – un weiß nit, wat mer maache soll,

et kütt, wie’t kütt un es wie’t es – wat ene Dress…

Der Minsch sich jot am Levve hält – es hä op alles enjestellt,

mer singk un drink un mäht sich Moot – un hät mer Jlöck weed alles jot.

Wat wills de dun, et es doch klor: mer weiß, et bliev nix, wie et wor,

dä ein hät Ping, dä andre Schess – wat ene Dress…

Em Kleine es die Stadt janz jroß: em Veedel es mer jot ze Fooß,

doch fählt de Loss, mer hät kein Zick – dann es et för de Fööß ze wigg.

Dä U-Bahn-Bau es Rotsbeschluss – mer weiß jenau: do kütt nix ’rus,

denn eint es klor un och jewess: Dat es Dress!

Et weed janz deef em Jrund jebaut, jebohrt, jeklopp, jedonn, jeklaut,

Ieserbüjel bruch mer nit – verklopp dä Krom un fott domet!

Es nix passeet – wat well mer mieh? Dat bessje Kribbel deit nit wieh…

Et zällt, dat do zofredde bes – bei all dem Dress…

De KVB, die es op Zack: wann’t nüdich es, weed anjepack!

Die kölsche Ääd möht billijer sin? Die KVB, die kritt dat hin:

Met Löcher en der Unterjrund – dann jeit et och vun unger rund,

wie dat zo Kölle usus es – wat ene Dress…

Atlantis niemand wiederfand – Troja es em Kreech verbrannt,

Karthago woodt vun Rom zerstört – do blevv nit vill, wie man so hört,

auf Kreta Knossos jingk ze Bruch – ein kurzes Beben war jenuch…

durch’s Fundament ein tiefer Riss – su ne Dress!

Pompeji es jot zojedeck – en Lava sin de Lück verreck

Runghold loch am Nordseestrand – un jetz es et unger’m Sand.

All die Städtcher sin kapott – sin nit mieh do, janz einfach fott…

Et kütt wie’t kütt, et es wie’t es – alles Dress!

De Minsche he sin akkerat – die maache Kölle selvs parat:

Wat bruch mer Beben, Föör un Flut?! He brängk mer selver sich en Nut!

Dat koss jet Zick un koss jet Jeld – dann es mer en der Unterwelt…

Mer weiß jo, wo et wärmer es – janz ohne Dress!

Bliev ens vun Kölle nix mieh ston, jeiht mer ze Fooß, vielleich noh Bonn?

Die janze Stadt, die es em Aasch – dä Dom litt en der Tiefjarasch.

Su künnt et sin – wör Kölle fott, et Schlemmste wör, do leever Jott:

Ein jeder Jeck ne Imi es – jo, ävver dat - wör richtich Dress!

Abmelden | Bearbeiten